L'illusion

I veronesi… un privilegio
g’ha ogni dì a disposission:
quel de sentirse sempre giovani!
(pur se l’è solo illusion)
parché da anni qua ’l giornàl,
a intervalli regolari,
sbàra titoli e notissie,
co un rilievo sensa pari,
che in realtà i è sempre quele
za sentìde e pubblicàde
con le identiche parole
solo un poco taconàde...
Gh’è i articoli sul smog:
“C’è emergensa! Aiuto! Alarme!
La città l’è invelenàda!
Qua sta polvar pol copàrne!”
Quando dopo, par salvarne,
el Comune no ’l  fa gnente,
i se varda ben dal fàrghe
qualche osservassion decente!
ansi, i illustra co entusiasmo
ogni farsa che i se inventa!,
e le “domeniche senz’auto”!
sempre più le ne infumenta!
Gh’è notissie ricorrenti
sul doman de l’Arsenale:
sopralluoghi e gran promesse
che po’ le diventa bale,
ogni volta mescolando
i progetti più eclatanti
de musei, academie, verde,
piani bar e ristoranti!
Quando po’ lì i ghe sassìna
anca ’l teatro de Verona,
no i s’incorze da copàr
l’unica roba che funsiona!
Ogni tanto po’ i ne conta
tuto quel che nassarà
fin lassù a Castelsampiero
col... museo de la cità!
E “presto nasce il Central Park”
co entusiasmo sensa fine...
in realtà i ghe ciama “Central”
e i le fa a le Golosine!
Po’ titoloni su le buse
in do’ sprofonda la cità...
co ormai l’unica certessa
che nessun le giustarà...
E torna sempre i stessi titoli
par la “casa de Giuleta”:
“Pronta è ormai la soluzione
pe ’l balcone, par la teta!”
Altri trucchi da paese...
altri schèi gh’è da ciuciàr...
fin che intanto, fra le ciunghe,
resta solo un gran luamàr!
L’è insoma grassie a ste notissie,
ritrovandole ogni tanto,
che i veronesi torna giovani
come par un stranio incanto...
ché, rilezendo i stessi titoli
visti za trent’ani fa,
i se illude che sto tempo
in realtà no ’l sia passà!