La proposta

L’è da tempo imemorabile
che ’l Comune ’l se intropeta
nel sercàr le solussioni
par la “casa de Giulieta”:
no i sa come riordinàr
dei turisti la gran fila,
no i sa più cosa inventàr
par ciuciàr sempre più pila!
E in sti giorni dèsso i ’nvoca
grande collaborassione!,
e pareri, idee, proposte
par catàr la solussione!
Alora mi, modestamente,
na proposta ghe l’avrìa!,
rispettando la cultura,
la verità e la fantasia:
se dovrìa subito cavàr
sporcarìe, scritte, lucheti,
e con una man de bianco
seppelìr tuti i bilieti!...
(se anca Sespir ha lassà scrito
che a Verona gh’era el mar,
no par questo bisòn dèsso
qua negàrse nel lùa...mar)
e mettar, grande, su la porta
del cortil na vecia foto,
che mostrasse come l’era
prìa che se metesse in moto
sto cancan eccessionale
fin ancò portàdo in porto
profittando che ’l bon Sespir
da un bel toco za l’è morto:
un modesto cortileto
sconto in mezo a la città,
sensa un fil de l’arte vera
dappartuto sparsa qua...
Po’ smontàr tuto ’l balcon
(sensa far tanto bacan)
e, par darghe el posto giusto,
trasferirlo a Gardalàn!
Prima sol de desmotarlo,
n’antra volta qua invitàr
chi ancor proprio g’ha bisogno
sol de bale par sognàr:
far in modo che ’l tal giorno
tutti quanti i cora là,
avvisando che sta visita
proprio l’ultima sarà!
E, quando i sia tutti schissàdi
streti streti impilonà,
fra la spussa de le ciunghe
in mezo ai muri sluamarà,
far spontàr sora el balcon,
ben tirà da le do parte,
un strission con sora scrito:
siete qua su “Scherzi a parte”!
E l’Assessora a la finestra,
sorridente, linda e bela,
che ghe fassa a quei de soto
anca el gesto de l’ombrèla!
... come a dir: par anni e ani
v’emo sempre buzarà!
Questo qua l’è solo un falso
che un bel dì s’emo inventà!