El progeto

Finché ancora i ne straparla
de Arsenal, funicolare,
filobùs, Ikea, traforo,
e de multe col palmare,
dal Comune, che va avanti
a forsa de promesse e bale,
è rivàda de sti giorni
na proposta demensiale:
un consiglier che proprio esiste,
che l’ha fato ’nca na lista
par andar insieme a Tosi
de poltrone a la conquista,
l’ha proposto no de far
quel che serve par Verona,
o sercàr fondi par giustàr
tuto quel che no funsiona,
par salvàr albari, giardini,
sistemàr ben l’Arsenale,
rispettar i monumenti,
far el traffico normale...
L’ha proposto de far far,
par impilonarla in sìma,
na gran statua, un sacranon!,
ben piantà su la collina,
che rafigura i noti amanti
coi pié su le Toresèle...
po’ su su par sento metri
con le sùche fra le stele!
“Così – el dise – tuto el mondo
capirìa la sintonia!”
... e qua tuti a domandarse
sto gran genio cì mai sia...
S’ha scoperto che l’è ’l stesso
che un bel giorno, a scotadeo,
avea pensà inventàr na casa
e dirghe “Casa di Romeo”!
Insoma, ’ncora un altro falso!,
come quela de Giulieta,
come anca la so tomba,
quela sporca longa e streta...
Ma lu el dise: “Sì, l’è vèra...
ma ghe casca tanta gente!
Se ghe ne inventemo n’antra,
femo i schèi alegramente!”
E, par farne ben capìr
’sa l’intende par cultura,
el vol anca par l’Arena
una immensa copertura!
E su l’Adese el vol metar
un mulino eccessionale!
... za i è bravi, lì in Comune,
a far ben giràr le pale!
Sti progetti ha za attiràdo
dei più esperti na fiumana!
... Par che i primi a consultarlo
i sia stà... quei de Marsana!