El filobus in ritardo

Giusto diese mesi fa
i annunciava con clamore:
“Ecco il filobus ch’è pronto...
manca ormai solo il colore!”
E l’istà i avea zontàdo:
“Certo partirà in settembre!”
... ma nissuno mai l’ha visto
anca s’è passà dicembre!
E i n’ha fato altri proclami
de le feste sul più bello:
“Sarà il bùs, nell’anno nuovo,
il nostro fiore nell’occhiello!”
L’Assessore con gran pompa
anca presentà el l’avea,
abbracciàdo ne le foto
al modèl nomà “Citea”...
con “magnetica la guida”!,
“vincolata” o zo de lì...
dèsso riva la notissia
che la Ditta... l’è falì!
“Ben, l’è istesso – dise Corsi –
Chieti, dai, gnente patèmi!
Vedarè che in du e du quatro
risolvem tuti i problemi!”
E riparte la rosaria
dei modelli più impensati,
che’l progresso ne regala
tuti quanti accessoriati!
Se pol farli ultramoderni!,
con tiràche o anca sensa!
... se te casca po’ le braghe
ben, va là, porta passiensa!
Con “baterìe ricaricabili”!,
sconte ben soto’l sedìle...
bastarà solo ogni tanto
andar zo a cambiar le pile!
O con l’oio de la consa!,
quelo de le patatine...
spussa d’oio a le fermate...
ma col saor de le festìne!
In sto novo calderon
de promesse e de proclami
che sul fìlobus ’gni giorno
i ne dispensa a piene mani,
una roba sol sicura
n’è restà da digerir:
che l’è ’l filobus in ritardo
prima ancora de partìr!