Dopo el furto a Castelvecio

El s’ha fatto far le foto
con de lagreme un gran secio,
fin che tristo ’l comentava
quel gran furto a Castelvecio...
E, avendo anca la veste
de Assessor a la Cultura,
l’ha dito po’: “Sto furto
è proprio una sciagura!
È una vergogna, un’onta
per tutta la città!,
provocà da veri barbari,
sensa un fil de civiltà!
No, non si può permettare
sia sassinà tanti tesori!,
privàr tutta Verona
de sì gran capolavori...
far sparìr opere d’arte
ch’è par tutti na richessa,
e robàrghe ai cittadini
ogni amor par la belessa!
Chi ha fato tutto questo
l’è un vero delinquente!,
un vandalo incivile,
un nemìgo de la gente!”
Finì sto bel discorso
de comento e riflession,
l’è tornàdo in Municipio
pa’ continuàr la so mission,
e l’ha riscominsià a impegnarse
a portàr ’vanti i so progeti,
preparàdi za da anni,
za anuncià dai so capetti...
obiettivi ben precisi
perseguìdi a grandi passi,
coi reperti quei più antichi
degradàdi a “quatro sassi”!:
lassàr morir la lirica,
distruggiar l’Arsenale,
stravolgiar ben l’Arena
co un tetto demensiale,
dar via du tri palassi,
lassàr morir i forti,
far cressar su par aria
un grattaciel de morti...
Pa’ esaltàr sti so progetti,
dir: gh’è za lavori in corso,
e pa’ ilustràrli po’ a la gente,
l’ha sercàdo un bel discorso...
e, vardando fra i so apunti,
’n mezo a gran macie de onto,
el s’ha incorto sodisfato
che ’l ghe l’avea za pronto:
e l’identico discorso
pronuncià par Castelvecio
el l’ha ritiràdo fora
... e ’l se l’ha dìto al specio.