El tempo del smog

Dopo el tempo del traforo,
e del cuèrto de l’Arena,
dei progetti de Arsenale,
de Giulietta sempre in pena,
dopo tanti paginoni
che a intervalli regolari
ghe promette a ogni problema
solussioni sensa pari,
è rivàdo puntualmente
l’annuncio che in città
semo tutti invelenàdi
da lo smog che n’ha impestà!
E saoni e grandi esperti,
coi discorsi più contorti,
i ne annuncia che fra poco
za saremo tutti morti!,
che urge dei provvedimenti,
che l’è questa un’emergensa!
De interventi risoluti
no se pol più farne sensa!
Se doarìa un pocheto almanco
el gran traffico fermàr,
liberàr un fià le strade,
farne tutti respiràr,
introdur i giorni alterni,
rispettàr l’ecologìa,
lassàr corare le bici,
far el bus o la tramvìa…
Ma, a sto punto, cossa fàlo
el Comune competente?
Come tutti i altri ani,
el ghe pensa… e no’l fa gnente!
… parché quel che più spaventa
chi amministra la città
no l’è mìa che possa in tanti
qua morìr invelenà,
ma che dopo no le vota
tutti quanti quei che inquina!
“Non possiam penalizzarli!”
dise Tosi una mattina.
… E così penalizzàdi
restaremo proprio tutti!,
sensa più pensàr a dani,
a disgrassie, mali o lutti…
E tornaremo a ’bituàrse
ai proclami de emergensa,
come al sport, a le promesse,
ai malani, a l’influensa…
E in Comune, preoccupàdi
sol de un calo de consensi,
presto i tornarà a esibirse
nei progetti più smelensi…
fin che tutti scopriremo,
invelenà veci e butìni,
che no è mìa calà i consensi,
è calàdi… i cittadini!