La continuità

Par dies’àni qua a Verona
n’aministrassion de testa dura
la n’avea lassàdo sensa
n’Assessor a la Cultura!
L’è stà proprio na vergogna
par na cità come Verona,
in do’ dovrìa po’ la cultura
essar la prima che funsiona!,
in na cità sì tanto ricca
dei tesori de la storia,
de poeti, Santi, artisti
rivà su fin a la gloria!,
co i so splendidi cantoni,
coi capolavori sconti
a Castelvecio, al Lazzareto,
fra le torri, sora i ponti...
Quando un giorno po’ è rivàda,
nova, sta Amministrassion,
gh’emo avùdo, ai primi passi,
una gran consolassion:
n’Assessore l’è stà messo!,
ansi, mejo: un’Assessora!...
ne le stanse del comando,
al terso piano, su de sora!
E la s’ha fato in pressia vedar,
più che par concrete assioni,
pa’ immancabile presensa
a tutte le inaugurassioni!
Sempre con la stesa posa,
col sorriso stampà in facia,
come se ogni inissiativa
fusse sempre sensa macia!
sproloquiando qualche volta,
e confondendo qualcoseta...
trascurando quel che conta
... pa ’l “balcone de Giulieta”!
Fatto sta che dopo un poco
s’emo incorti, dito fato,
che, volendo far qualcosa
che no sia za codificato,
po’ a la fine, struca struca,
chi da anni fa cultura
s’ha trovàdo lì davanti
impenetrabile chiusura!...
ché, par paura de cambiàr,
la se mete su l’atenti
e la fa sol, obediente,
quel che dise i dirigenti!
I le avverte che un Ufficio
ghe ne fa sempre manèle?
No la move gnanca un deo
pa’ evitàr altre capèle!
La core ansi sorridente
par na foto tacà al nastro
a brasseto con quei stessi
pronti a far n’antro disastro!
... Sicchè infine emo capìdo
come mai i l’ha nominà:
l’è na scelta che i ha fatto
“in segno de continuità”:
ché no gh’è gran difarensa
con cì gh’era de sti ani:
in do’ no gh’era mìa nessuno:
gh’emo adesso... la Briani!