Carneval quaresimal

No savemo gnanca più
in che tempo che vivemo,
no g’ha più significato
le parole che disemo...
I n’ha dìto e ripetùdo,
e l’ha scrito ’nca ’l giornàl:
co la Festa de la Renga
è finìdo el Carneval!
In realtà ’ncora imperversa,
za da un toco programmate,
sempre nove grandi feste
con coriandoli e sfilate...
e ritorna dapartuto
un balengo Carneval,
capitàdo fora tempo,
diventà... quaresimàl!
Dove un tempo se invocava
sol silensio e penitensa,
par, adesso, che de carri
no se possa fàrghe sensa:
se confonde a più no posso
le sfilate e le funsioni,
le magnàde coi digiuni,
le baldorie e le Passioni...
Sfilarà magari el Duca
ma de la Pignàta uda,
ai butìni l’Iscarioto
ghe darà “baci di Giuda”...
Co un baston con de l’asedo
sfilarà un roman soldato,
nel cadìn “mani pulite”
g’avarà Ponzio... Pelato.
Ghe sarà coi pignatini
’l cogo de l’Ultima Cena,
e magnando bomboloni
pianzarà la Maddalena...
E anca in Setimana Santa
fin le Palme servirà
saludàr Papà del Gnoco
sul so musso entrà in cità
’Sa vol dirne tuto questo,
lo capissi pure tu:
la Quaresima l’è sparìda,
el Carneval... no ’l gh’è più.