El Carneval e la Quaresima

I n’avea dito e ripetùdo,
l’avea scrito anca ’l giornàl,
co la Festa de la Renga
è finìdo el Carneval!
In realtà ’ncora imperversa,
za da un toco programmate,
sempre nove grandi feste
con coriandoli e sfilate...
e ritorna da par tuto
un balengo Carneval,
celebràdo fora tempo,
diventà... Quaresimàl!
ché, nel tempo dedicàdo
un dì solo a penitensa,
par, adesso, che de carri
no se possa farne sensa.
E se confonde a più no posso
le sfilate e le funsioni,
le magnàde coi digiuni,
le baldorie e le Passioni...
Fato sta che, de sto passo,
in provincia, qua o de là,
nove maschere speciali
da par tutto nassarà...
Ghe sarà, sì, ancora el Duca
ma de la Pignàta... Uda!,
ai butìni l’Iscarioto
donarà “baci di Giuda”...
Co un baston con de l’asedo
sfilarà il Roman Soldato,
nel cadìn “mani pulite”
g’avarà Ponzio... Pelato.
Ghe sarà, coi pignatini,
el Cogo de l’Ultima Sena,
e magnando bomboloni
pianzarà la Maddalena...
I ’nventarà la Caminàda
“sul Calvario con passion”
con gran punti de ristoro
e salamèle ogni stassion!
E anca in Settimana Santa
fin le Palme servirà
a plaudìr Papà del Gnoco
col so musso entrà in cità!
Gh’era el tempo, me ricordo,
una volta, del bacan,
de festanti sganassàde,
de gran schèrsi a tutto spian...
Gh’era po’ qual de la chiete,
de silensi e riflession,
de speranse coltivàde
aspettando la Passion...
Dèsso no savemo più
in che tempo che vìvemo,
no g’ha più significato
le parole che disemo.