Proposte balenghe

Ogni tanto qua la Lega,
sempre più salda in savàte,
la se inventa e ne sorprende
con patetiche trovate...
I se inventa gran proposte
struca struca sbalinà,
sol par dir: semo noialtri
quei che ancó comanda qua!
I ha proposto na mattina
de donàr a ogni neonato
na bandiera de San Marco
col leon incorporato!
No ghe sarìa in realtà bisogno
de piantàr altre bandiere,
de inventàrse novi muri,
de seràr altre frontiere...
sensa po’ pensar che un bocia,
involtolàdo a più no posso,
a quel storico vessillo
el porìa pissàrghe dosso!
E n’antra nova, de sti giorni,
i s’ha sforsàdo de inventàr:
de impiantar un sito aposta
par... solo ’l Veneto parlàr!
e che ’l sia tutto in dialeto!,
co le so raise e i so radeci,
parolasse e becanoti
che diseva i nostri veci...
e che se dòpara el dialeto
par descrivar i musei,
el turismo, la cultura...
(che la pol frutàr dei schèi!)
che se insegna ne le scole
ben la lingua... no “tagliana”!
quela veneta soltanto!
quela nostra, quela sana!
E i le ciama aposta “lengua”
come la fusse salmistrata,
da gustàr con i capussi,
coi bruscànsi o la salata!
Mi me par, st’idea balenga,
un prodigio de ignoransa,
che no nasse da un servèl
ma piutosto da la pansa...
No i sa mìga che ’l dialetto
in realtà l’è... na parlata!
No se pol codificarlo
come dentro qualche grata...
ma bisòn lassarlo vivo!,
che fra la gente el vola via!,
che ogni giorno ’l se trasforma
con realismo e fantasia...
E se gh’è dei gran scritori
che l’ha tradoto co la pena,
l’è stà sol parché i attori
po’ i le parla su la scena...
E Ruzante e po’ Goldoni
l’ha adattàdo e reinventà
sol par riprodur la vita
e vicinarse a la realtà!
No riva ’nsoma alcun tributo
a la nostra civiltà
sol ciamàndoghe a na mama
“quela là che t’ha cunà”!