Le comiche de la comission

Un Direttore Artistico
i doveva nominar...
ma, passàdo quasi un anno,
no i sa ancora cosa far!
E proprio quei che dovarìa
scègliar ’l novo direttor
ogni giorno i gh’ in combina
più de una par color:
de “spettacolo e cultura”
occuparse i dovarìa,
ma ste robe, struca struca,
noi sa gnan’ cosa le sia!
Sarà par quelo che i se sforsa
de far lori da pajàssi!
... confermandone el parcome
la cultura l’è a sti passi...
L’inissio de la farsa
l’era stà de l’Assessora,
quan’ col solito sorriso
l’avea dito un di’ bonora:
“Sono stati sol malvagi
quei che ci hanno criticato!
Posso dirlo con orgoglio:
io quel bando l’ho copiato!”
I s’avea po inventà un giorno
quela battuda eccessional
vantando: “Abbiamo noi scoperto
che in dicembre vien Nadàl!”
N’antra volta l’Assessora
l’avea dito permalosa:
“I nostri Uffici fan miracoli,
e lavoran senza posa!”
Dèsso i pubblica, in sti giorni,
dopo rinunce e ribalton,
ci mai sia sti sinque geni
che gh’è dentro in Commission.
Gh’è du dirigenti oscuri
in Comune da na vita...
che no i è mai stà a teatro
gnan ’na volta ne la vita!
Un tal Molon g’ha la Cultura
... ma par lu l’è bestia rara!
e col so Ufficio el ghi n’ha fato
più che in una... Molonara!
I tri altri esperti, acreditati
de competensa e de un gran karma,
varda che combinassion...
i vien tutti tri da Parma!
No se sa con che criteri
sia stà ciamàdi in Commission...
“È prosciutto? No, è di Parma!”
i avrà sentì in television!
Fatto sta che adesso i dise:
“Il lavor procede svelto!
Potrete presto, o cittadini,
saper già chi sia il prescelto!”
... in realtà l’avrìa dovùdo
scominsiàr a governàr
par due anni, calcolàdi
a partìr za da genàr...
Ma lori i dise: “Pe’ un biennio
l’eletto in carica sarà!”
... e no i s’incorze che ’l biennio
za da un toco l’è passà!