La galina

I l’ha za ignorà con sdegno
la proposta qua lanciàda
de, a la gente, confessar
che l’avemo buzaràda,
inculcàndoghe par ani
la sicura convinsion
che proprio in quela Casa
ghe fusse stà el balcon
’ndo’ Romeo ’l se rampegava
par incontrar Giulieta
fin che ghe fasea da lume
quela luna malingreta...
No gh’era mìga Sespir
a spiarli da un canton:
qua no l’era mai rivàdo
gnanca un fià de ropeton!
(el credeva adiritura
che qua ghe fusse el mar...
e la sola somejansa
l’è che dèsso l’è un lùa... mar)
Ma el se l’ha solo inventàdi
po’ con l’arte e la poesia,
fin a far, de la so storia,
la più bela che ghe sia!
Ma i è stà po’ i veronesi,
i più scaltri, un bel momento,
a sistemàr quel cortileto
pa’ inventàrse el sfrutamento!
E gran folle de turisti
ha tacà subito a rivàr,
credendoghe a la fola
par el gusto de sognàr...
E par anni e anni e anni
’ministratori e comercianti,
afaristi e facendieri
e politici ignoranti
par scegliar cosa far
no i g’ha pensà un momento:
in malora la cultura,
continuemo el sfrutamento!
Ma è rivàda de sti giorni
un’importante novità!:
parfìn l’opposissione
el Comune l’ha invità,
co la scusa de l’amor,
a seitàr sensa decoro
a sfrutàr ben “la gallina...
quela da le uova d’oro”!
... Sicché adesso l’è ufficiale!,
e riussirà, sta novità,
a svelàr infine al mondo
quala l’è la verità:
che el simbolo d’amor,
la romantica eroina,
par Verona, struca struca,
lè solo... na galina!