... “Odi et Amo”...

I ne aveva proclamàdo:
“Bisòn tutti darse pena!
Ghe vol gente competente
par valorizàr l’Arena!”
Ma quan’ po’ è rivà ’l momento
de cambiàr cì le sassìna,
i ha pensà solo ai so amissi,
i ha rimesso quel de prima!
Dèsso i scopre, de la lirica,
che la qualità l’è scarsa!
E i continua: noi l’amiamo!
... ma l’è solo n’altra farsa.
Ghe vien fora, ai musicisti,
preoccupassion da tuti i pori:
dèsso i mola ’l Filarmonico,
par po’ strenzarse al Ristori!
I turisti, ’ntanto, in coa
sol par vedare l’Arena,
quando i vede quanto ’l costa
i dise: “No, no val la pena...
L’è anca sporca, i dise tuti...
semo in sinque, sié col sìo...
e sta coa qua de mezora!...
Dai, che femo marcia indrìo”
El Comune, d’altra parte,
par risolvar la question,
come za par la Giulieta
g’ha na sola solussion:
par sfrutàr de più i turisti,
par che ’l sol progetto serio
sìa far fàrghe a tutti el giro
... parché i passa da Valerio!
E el famoso gran Museo
de la Lirica, importante!,
in do’, butàde via le strasse,
i g’ha fato un ristorante,
dèsso i dise: el costa massa!
No i sa più come pagarlo...
serca l’Ente, disperàdo,
al Comun de sbolognarlo!
Scrivea un tempo ’l gran Catullo,
vate de le nostre gente:
“Odi et amo”, come a dirne
che se smissia i sentimenti...
Così anca ’l Museo “Amo”
pianpian ’l nome l’ha cambià:
prima “Amo”, po’ “Soporto”,
dèsso... “Odi” è diventà!
Sta discesa sconvolgente
chissà ormai quanto la dura...
ma andaremo sempre pezo
sensa amor par la cultura.