N’antro ritardo
Parole, pensieri, a ruota libera dell'istrione Roberto Puliero
N’antro anuncio sbandieràdo
el s’ha rivelà bugiardo...
come filobus, traforo,
anca questo l’è in ritardo:
l’idea tanto balenga,
l’assurdo progeto
de costrenzar la gente
a pagar un bilieto
par vedar soltanto
un cortil, la caseta
che i vol farne credar
che la sia de Giulieta,
annunciàda par mesi
za sicura e imminente,
no la parte gnancora!,
in barba a la gente.
Dentro stà “casa chiusa”
resta vivo l’intento
de far de sta fiola
un bel sfruttamento,
ma el Comune col Novo,
quei che fa i protettori,
no è d’acordo sul come
po’ spartìrse fra lori
i proventi dei tanti
che, imbroiàdi a la bona,
i arriva intortàdi
da... l’amor de Verona!
I paroni del Novo
i vol dèsso più schèi!...
E quei del Comune,
che i so sìti più bei
– l’Arsenale, l’Arena
la tore col Rengo... –
el lassa ogni giorno
che i vada a remengo,
dei soldi ciuciàdi
el vol la so parte!
El pretende, l’imbrojo,
che ’l sia fatto con arte!
No i ha ’ncora deciso
quanto i se spartirà...
e, fin che lori i barufa,
’ntanto ariva l’istà!
Pensa ti po’, in sostansa,
quanto l’è che interessa
regalarghe a la gente
el calor, la belessa...
Ghe importa soltanto,
sensa gnanca un rimorso,
de contarghe ai turisti
anca quela de l’orso...
e spartirse la torta
fin a quando la dura,
sensa gnanca lassàrne...
un cicìn de cultura!
