I protettori

La Giulieta, che la vanta
un sfrasèl de ammiratori,
che le sfrutta – pensa! – adesso
la g’ha ben tri protettori!:
el Comune el s’ha acordado,
dopo mesi de gran beghe,
anca col paron del Novo
e con quei de le boteghe.
El cancèl de via Cappello
i ha seràdo co la scusa
de voler la vecia casa
trasfomàr in “casa chiusa”,
e no vedar più, davanti,
tanta calca e confusion...
par entràrghe bisòn, dèsso,
andar quasi de scondon...
prepararse la moneda
che te serve pa’l biglieto,
far un giro ben più largo
e passàr da un vicoleto,
donde po’, schissàdo in fila,
te te cati dentro al Novo!
A quel punto i t’ha intortàdo:
te sì dentro nel so covo!
Stucchi, ori, gran velùdi,
butelote e figuranti
che declama quatro versi
e te invita a farte avanti...
in do’ te trovi... el tariffario:
du e sinquanta par vardàr
un insulso cortileto
e una statua spalpugnàr,
più del dopio se te vol
– pensa ti che sgrisolon –
entrar ne la “casa chiusa”
e gustarte l’occasion
de incontrar quela Giulieta
che – i te conta con calor –
l’è ciamàda in tuto el mondo
la regina de l’amor!
Ma là dentro... no gh’è gnente!
Te te senti imbidonà...
solo un poco più legero
par i schèi che i t’ha ciucià!
E, fin che Sespir se rigira
n’antra volta ne la tomba
(quela vera, no quel arbio
che i g’ha messo nome “tomba”),
dopo mesi de baruffe,
or sperando che la dura,
eco pronti i protettori,
inneggiando a la cultura!:
lori che, par interesse,
diventàdi i è fradèi,
dèsso in festa za i se cata
par spartirse mejo i schèi!