Magnàr o no magnàr?

I ne invita dapartuto
a ingozàrse de magnàr...
la tivù a tutte l’ore
la ne insegna a cusinàr...
Ma po’ d’un trato riva anunci
che spaventa assè la gente,
che, aggredì da ste notissie,
più no la capisse gnente!
Eco l’ultima in sti giorni:
la bisteca la fa mal!
Un pocheto se pol torla,
ma de vaca original!
... vardàr ben se l’ha magnàdo
l’erba bona o l’erba strassa,
controlàr po’ se, magnando,
l’ha sfiorà qualche boassa...
E vien fora che anca el late
a malàrte el te condàna!
... ma za ormai l’è massa tardi
par ciuciàr quel de to mama...
E i condàna ’nca l’oveto,
che tanto ben fasea bonora!,
e i te fa vegner dei dubi
a pensàr da indo ’l vien fora...
Qua par secoli i scritori
i ha esaltà la nostra tera...
m se te vè po’ a far la spesa
ti te pensi: no è mìa vèra...
ché te cati in abondansa
pomodori da l’Olanda,
e i limon da l’Argentina,
i capussi da l’Uganda...
Soteràdi da l’asfalto,
dèsso i orti no i gh’è più!
I bisi vien da la Polonia,
le carote dal Perù...
Se po’ te vè al Supermercato,
lì... ne l’orto i te le mete!,
ché briganti produttori
i taroca le etichete!
E deventa, ne le scritte,
el vialone... un gran stradon,
el prosecco un bon cresecco,
l’amarone... un armaron!...
Sconcertàda, la massaia
no la sa più cosa far...
e intristì, disorientàda,
no ghe resta che pensàr
che i so noni, sensa studi,
sol sagessa e pochi schèi,
sensa paure i se curava
i so orti e i so porsèi...
e i consigli dei saoni
i ignorava col boresso!...
I è vissù par ani e ani,
e a la fin... i è morti istesso!