Una bala come tante

Seguendo spudorati
un’antica tradission,
che in Comune i se tramanda
za da più generassion,
in na conferensa stampa
convocàda su du pié
presentà i ha con gran pompa
una roba... che no gh’è!
I ha ’nuncià con sicumera
(e magari el fusse vero)
un percorso affascinante
par gustàr Castel San Piero!,
che va su par la collina
rampegando su scalete
somenade in mezo a l’erba
e al calor de le casete...
E prati verdi illuminàdi
(chissà prima dove i era...)
dove allegri rugolarse
fin al rosso de la sera...
e sercàr chieto riparo
al vociare dei butèi,
e la scoperta dei tesori
sconti dentro nei Musei...
e vardàr infin da l’alto,
’nca restando sensa fià,
le belesse straordinarie
che regala sta città!...
Pa’ ilustràr ste smaraveje
el giornàl, sempre ubidiente,
ghi n’ha fato un paginon
pa’ incantare ben la gente!,
con gran foto affascinanti
de visioni mossafiato...
de butèi che sponsa lieti
sora “l’erba di un bel prato”...
Senonché, in de sto progeto,
ghe saria po’... un difetìn!
Su una riga el gh’è ’nca scrito
... ma l’è proprio picenìn:
l’è che, al centro del progeto,
a riunìr tuti i sentieri
dovrìa essar na stassion
inaugurà za l’altro ieri:
la Stassion quela Intermedia
de la gran funicolare,
presentà con grande pompa
in campagna elettorale!
Ma sta Stassion dìta “di mezzo”
...no la esiste mìa in realtà!,
ché gnancor no la funsiona,
e cissà mai se i le farà!
Ma i ha intanto rispettàdo
quela vecia tradission
che in Comune i se tramanda
za da più generassion:
de butàr fumo nei oci
a le parsone za confuse,
parché ancor no i se n’acorza
del gran smog, o de le buse!
E i n’ha insoma contà solo
una fola strabiliante...
che al momento l’è soltanto
una bala come tante!