Pian... piano

El giornàl de ancò ne anuncia,
come fusse novità,
che i lavori a l’Arsenale
cissà quando i le farà!
... In realtà l’è na notissia
che l’è vecia da vint’àni:
stesse foto e gran promesse,
stessi titoli e proclami!,
che ogni tanto po’ i ritorna
a intervalli regolàr...
ma ’l Comune ancora adesso
no ’l sa ancora cosa far!
E pensàr che invesse prima,
quando gh’era i militari,
gh’era tutto lustro e neto!,
sensa sogni miliardàri...
fin a quando che un bel giorno
al Comune i l’ha lassàdo...
È rivàdi alora i barbari,
e i l’ha tutto devastàdo!
Par che sia passà la guera...
tanti tetti i è sfondà,
casca i copi, cresse l’erba
ne le case za squartà...
Epur bastava un po’ de amor
par salvàr quei capannoni:
s’avarìa podù affidarli
ad artisti, associassioni,
che avarìa podù impenirli
d’arte e sogni in libertà,
con gran verde tuto intorno
pa’ i butìni e la città...
Ma tuti quei che in tanti ani
s’ha vantà de amministràr,
varda adesso cosa invesse
za i l’ha fatto diventàr:
del peggior politicàme
passarella abituale!
Ogni tanto un sopralluogo,
e  po’ via promesse e bale!...
fin che intanto i fasea stràje
de quel olmo pien de rami,
fin che i condannava a morte
vintisinque ippocastàni,
fin che insieme i sassinava
fin el campo del balon,
par speràr de farghe insìma
un gran super mercaton...
E ogni tanto i torna fora
con la grande novità:
“Qua faremo! Già c’è un Piano!
Qualche cosa si farà!”
Ma na roba sol l’è ciàra
quando i dise che “c’è un Piano”:
lì le robe le ’ndrà avanti
tut’alpiù pian piano... piano.