La maschera del cor

Co la stessa facia tosta
che ha inventàdo ’nca ’l bilieto
par vardàr un balcon finto
da un insulso cortileto,
la città che s’ha inventàdo,
in segno... d’ospitalità,
le panchina co le sbarre
coi so bei tubi ingiassà,
el decreto che proibìsse
de portàrghe da magnàr
a cì è solo sensa un tetto
e no ’l sa più dove andàr,
e quel altro che comanda,
pa’ adolcìr sti tempi cupi,
de imparàr dopràr la s-ciòpa
pa’ sbaràrghe in costo ai lupi,
la città che s’ha inventàdo
el progetto demensiale
de impilàr tuti i so morti
l’un su l’altro in verticale,
dèsso in mascara se mete!:
drìo se sconde a tanti cuor,
purché vegna tanta gente
qua a la “festa de l’amor”!
E i ghe schìssa nel progràma
el “sigillo de l’amore”...
e po’ “un cuore da scoprire”...
e “il messaggio con il cuore”...
e magnàde, el “liv in lav”,
el buffetto incorporà,
e “chi se basa par un’ora”
sensa mai tiràr el fià...
e po’, fòrsi par frenàr
tuto ’l miele che se spande,
st’ano ancor i s’ha inventàdo
’sa vol dir “copàr Cangrande”!
... Presentàde con gran pompa,
tute manifestassioni
camuffàde de cultura
e infarcì de paroloni,
che i è istesse po’ de quele,
ai tempi de le vache magre,
che i fasea ’n tuti i paesi
co le giostre ne le sagre...
ma che adesso el fin i svela!:
la cultura... che la vaga!...
ma che vegna tanta gente!,
e soratutto... che la paga!