La farsa

I s’avea messo tutti in posa,
tutti in ghingheri, schierà,
co la Giunta al gran completo,
tutti quanti imboressà,
coi sorrisi stampà in facia
preparà par l’occasion,
un fià patetici e trionfanti
a ostentar sodisfassion...
I avea convocà i fotografi,
i serventi e i lecapié
par ’nunciàrne con gran vanto:
“La solussione adesso c’è!
Per la casa di Giulietta
ecco qua: tutto è deciso!
Ve lo annunciàmo, o cittadini,
con orgoglio e col sorriso!”
... È passà tri quattro mesi,
e no i ha più fatto gnente!
... e ’l se sente, el cittadino,
trattà come un deficiente!
... ché tutta quela pantomima,
quela farsa messa in scena,
la s’ha rivelà na bala
che in realtà fa solo pena!
N’antra bala come quele
che annunciava, ben o mal,
el Central Park, el stadio novo,
el filobùs e l’Arsenàl...
seitàndo ne la so manìa:
la tendensa a proclamàr
tante robe ormai za fate
quando i è ’ncora da far!
Par la “casa” de Giulietta
in realtà, par precision,
i g’ha da decidar ’dèsso
fra du diverse solussion...
Ma tutte du za le prevede,
co impudensa clamorosa,
n’incredibile pensàda,
na proposta vergognosa!
I vorìa, a chiunque riva,
far pagàr el so bilieto
anca solo par entrar
a vardàr quel cortileto!
...e, fra la spussa de le ciunghe
e ’l luamàr dei bilietini,
tacà via con el spuàcio
come faseino da butini,
mescolàdi fra la gente,
tutta in coa za da bonora,
un’ocià dàrghe al balcon
... però solo dal de fora!
par, da quela casa finta,
poder ciuciàr finché la dura...
fin che lori ancora i conta
che i le fa... par la cultura!