El ragasso de la Via Marta

“Questa è la storia de un de noantri
nato un bel giorno par caso in Via Marta,
dove ’l sperava passàr tuta la vita
senonché un giorno... bisogna che ’l parta...
Questo ragasso de Via Santa Marta
el se godeva a zugàr co’ altri bocia...
Tuto d’intorno gh’era tri quattro campi
fati de sassi, bagnà da na pocia...
Le vecie casete tirà su co la malta
le se sostegneva fra lore a la bona,
scondendo là in mezo du tri cortileti
del più pitoco quartier de Verona...
Eppur proprio lì un dì quei del Comune
i s’ha inventàdo, fra mille proclami,
de farghe lì in costo un grande Teatro
(... che dopo, par farlo, i g’ha messo trent’ani!)
E a lu, bocieta, gh’è spuntàda un’idea,
e l’ha scominsià d’improviso a sognàr
de riussìr anca lu de andàrghe un dì dentro
e magari, chissà, anca lu a recitàr!
Ma, dovendo partìr par catàrse un lavoro,
un giorno disse: “Vado in città!...”
... e lo diceva mentre piangeva,
da do lagrimete co la facia bagnà...
E quando, un bel giorno, l’ha podùdo tornàr,
el Teatro lì intanto i l’avea belo piantà!
E, ritrovando gli amici che aveva,
l’ha ripescàdo el so sogno incantà...
I ha messo insieme un grupeto de “artisti”
(artisti... i era solo du tri butelòti
... par dirla tuta, no i era mìga granché...
i era insoma, in realtà, ’bastànsa scarsoti)
Ma i ghe sperava, parché quei del Comune
lì faseva da anni soltanto malani,
e, sensa un cicìn de rispeto par l’arte,
i dava ’l teatro anca al boia da cani!
E un giorno i ghe dise: “Ma sì, anca a voialtri
va ben, ve lo demo! Firmème sta carta!”
E figurarse l’emossion, e la gioia
de quel butèl nato un dì a Santa Marta!...
Ma passa gran poco, e con bieco cinismo
i ghe dise de bruto: “No, no ve ’l demo più!”
“Ma... e ’l rispeto dei patti?” “E chi se ne impìpa!
È rivàdo uno bravo che paga de più!”
E, no ancora contenti de sta prepotensa,
con na faciatosta da cavàr el respiro,
i riva parfin a inventàrse una bala,
i se permete parfìn de torlo ’nca in giro!
E impudenti i ghe conta che, a scegliar quel posto,
quela lochèscion, l’era stà proprio... Lu!,
parché ’l s’era incorto, vedendo Via Marta,
che l’era l’istessa de la so Via Glù!
Così, buzaràdo da sta bala viliàca,
e dal giornàl che l’aceta sta penosa version,
al butèl derubà del so sogno balengo
ormai più no resta che cantàr sta canson:
“Là dove c’era l’erba ora c’è una città...”
Quel Teatro, quel sogno ormai no ’l gh’è più...
né lealtà, né cultura, né rispetto del vero:
i è qua solo i schèi quei che conta de più!