La “comica finale”

Al pastròcio del Camploy
za infarcì de tante bale
s’ha zontàdo de sti giorni
anca la “comica finale”!
Gh’era za fissà un programma
(assè balengo in verità:
i g’avea infilà de tutto,
anca gruppi scalcagnà)...
ma el Comune, sul più belo,
scancelà l’ha bruti e bei
sol parch’è rivàdo uno
che g’ha offerto assé più schèi!
Par giustificàr dèsso l’infamia
del crudele tradimento
d’ogni minimo rispetto
d’ogni patto e sentimento,
dopo aver così svelàdo
quala sia ’ncò la natura
dei princìpi che a Verona
i governa la cultura
(poco importa, tanti artisti,
se i sia bravi, cosa i faga:
quel che conta è poder dir:
ben, butèi, ma questi i paga!)
s’ha zontàdo ancò del Sindaco
questa gran dichiarassion
(sensa ridar za el giornàl
ghe n’ha fatto un titolon):
“Ecco chi è che vien adesso
a salvare Veronetta!
Presto arriva Celentano!
Il Comune già l’aspetta!
Accogliamo il Salvatore!
Sventoliamo le bandiere!
Il molleggiato lì al Camploy
valo-rizzerà il quartiere!”
... I vol ’nsoma fàrne credar
che ogni mal, ogni malano
sparirà tuto in un colpo
parché riva Celentano!
Se lo vedarà qua in giro
ogni giorno, ogni mezora,
a nettàr tuto ’l luamàro
con in man la spassadora!...
El sarà lu che con bravura
e con perissia sensa pari
ghe farà trovar na casa
a tutti i strà comunitari!...
E po’ el sanarà de boto
tuto el traffico ammorbante,
impinàndo ben la zona
de gran bei giardini e piante!
E... tuti quanti co la scoa,
pa’ imitarlo ogni buzzurro
el quartier farà risplendar...
tuti insiem cantando “Azzurro”!
No ghe crede mìa nissun
a ste panzane butà là...
nessun capisse, ste batùde,
da in do’ mai le nassarà...
Vien po’ in mente che a Sboarina
l’anno scorso, ben o mal,
za i g’avea dà la commenda
“benefattor del Carneval”!