La città del “la...more”

L’assessora a la Cultura,
co entusiasmo eccessionale,
l’ha definì “Veroninlàv”
un “evento culturale”...
indove sagre da paese
le se ingropa a tutte l’ore
par poder dir che “Verona
la città l’è de l’amore”!...
indove Sespir s’ha inventàdo
storia e morte de Giulieta
... e i veronesi alor, de paca,
“tomba” e “casa” de Giulieta
tutta finta, fata aposta
pa’ spilàrghe schei turisti
a cì ghe casca za da un toco
come tanti poricristi.
“La città qua è dell’amore”
de continuo i sbràja, i sbàra...
dopo aver ’mpinà i giardini
de panchine co la sbàra...
che pitochi e vagabondi
no i se azarda de butàrse!
I veronesi i è amorosi,
specialisti de le farse!
E inventà i ha un programmon
pa’ esaltàr sto sentimento,
intasà de strambarìe
tute quante a pagamento:
gh’è el “kiss in mongolfiera”,
la “magnàda con amore”,
la gran caccia del tesoro,
“in du a tola con il cuore”...
e po’ ancor “cuking in lav”,
e la sena e “aperifan”,
“skattakiss” e bancarelle
che te pela a tutto spian
propinando “con amore”
cioccolata e salamèle
avanzà dai mercatini...
che però i è sempre quele!
e l’“aperitorre”! (e te vien voja
de cambiar tosto città
se l’è ’ncora a piede libero
chi sto nome ’l s’ha inventà)
Vien alor da domandarse
quala po’ sia la natura
de sto rapporto che dovrìa
unir “l’amor” co “la cultura”,
e parché anca n’Assessora
la ghe ciama “culturale”
a sto missioto da paese
de cuccagne, sagre e bale...
finché, a vardàr sta baraonda
qua esaltà con tal clamore,
sto legame infin te ’l cati:
“la cultura” qua... “la more”.