El lavoro ... de pensàr

Son stàdo al Lazzzaretto
una sera de st’istà...
L’è un magnifico tempietto
là piantàdo in mezo a un prà,
spontàdo come par magìa
dentro un’oasi de belessa,
un’esplosion de verde e fiori
che ’l fiume coccola e caressa,
tegnù in alto da colonne
che le fa ’ncora elegante,
fin che intorno ghe fa ala
con ossequio mile piante...
L’è un antico monumento
che conserva la memoria
de eroismi e sofferense
che po’ i è la nostra storia...
Una richessa straordinaria
che i veronesi no i cognosse!,
come tanti altri tesori
sbandonà, sensa più vosse...
Con amor e con coràjo
l’ha recuperàdo quei del “Fai”,
ma or nessuno più le aiuta
a sistemarlo... come mai?
No gh’è mìga lì in Comune
un Ufficio... “competente”?
E l’Assessora a la Cultura
sèitela solo a no far gnente?
No i sa gnanca che l’esista!
Lori i scambia par cultura
sol la “casa de Giulietta”
da spennàr, finché la dura!
Eppur l’Assessora la ripete:
“Ci siam noi, tranquilli, gente!
Nel mio ufficio si lavora,
si lavora alacremente!”
Si lavora?! Ma se intanto
è passàda anca l’istà
e no gh’è ’ncor quel Direttor
che i dovea scègliar l’an passà!
... ch’el doveva entràr in carica
za dal primo de genàr!
Si lavora?! Dopo un anno
no i sa ancora cosa far!
E i cittadini, imbindonàdi,
i se domanda come in coro:
questi i dise che i lavora...
ma le sai ’sa l’è el lavoro?
Visto che i dise che i lavora
con impegno, sensa affanno,
forse gh’è na solussion
parché i fassa manco danno:
se pol cavàrghe la carega
indove i sta solo a pensàr,
dàrghe na zapa, un bel baìl
... e mandàrli a lavorar!