L’informassion d’istà

È rivàdi i primi caldi...
e dèsso anca i giornalisti
g’ha diritto a far vacansa
come tutti i poricristi...
E succede alor che, a turno,
se svùda pian le redassioni,
e i resta solo in quatro gati
a far giornài, televisioni...
Fato sta che tutti i giorni,
pa’ impenìr el palinsesto,
i mette sol veci servissi
– stesse foto, stesso testo –!
E se cronisti e operatori
i è za tuti ’ndà in vacansa,
no gh’importa, ché d’imagini
ghe n’è ancor più che bastansa!
Par documentàr el caldo
che ne copa e ne dispera,
gh’è le immagini abusate
del vecioto in canotiera,
o de turisti moj negàdi
co la pansa spampanàda,
o de la classica fontana
con butèla incorporàda...
Se no riva dai politici
novità, sia brute o bele,
ben, passiensa: le sempiàde
su par zo i è sempre quele:
gh’è Salvini che, abronzato,
contro i Rom el sacramenta,
gh’è DiMaio che, ridente,
de poltrone el se contenta...
Parfìn ’l vecio Berlusconi
no ’l fa più tanta cagnàra,
serà dentro in qualche villa
a pitturàr la cavejàra...
In tivù no i fa più inchieste
su problemi, atualità...
solo i pesca i veci casi
che i n’avea za propinà!...
Eppur qualche omicidieto
fòrsi ancor ghe sarà stà...
ghe sarà qualche scomparso,
qualchedun che i ha copà...
Gnente! Solo storie vecie,
no i fa più gnente de novo!
Solo repliche de coghi
fra ragù e ciàre de ovo...
e tanti veci telefilm:
case ne la prateria,
Don Matteo sinquantasinque,
gran fratello, in trattoria...
E chi magari l’è in boleta
e bisòn che ’l stàga in casa?
Che ’l se rangia! Che ’l se scalda!
O che ’l sponsa un poco, e ’l tasa!
La morale de la storia
questa alora l’è in sostansa:
l’è a la fin... l’informassione
quela sol che va in vacansa!
Ma co sta assensa de riguardo
par chi stenta soto al ciel,
gh’è ’l pericolo che in ferie
po’ ghe vada ’nca ’l servèl!