La puntualità

I saoni del balon,
par decidar chi sta in A,
chi va in B, chi resta in C,
g’avea tempo tuta istà!
I l’ha sprecàda in gran barufe
e proclami, discussioni,
e minacce de querele
fate sotto i ombreloni...
Solo dopo che i tornei
i era bei che scominsià,
i è rivàdi a le sentense
che i ha tutti scontentà!
E ancor dèsso – po’ i ne dise –
se pol sempre reclamàr,
ribaltàr ben la baraca,
e de novo scominsiàr!...
E però za po’ i pretende,
in mezo a tanta confusion,
de le regole el rispetto!
...co un coràjo da leon!
Anca el mondo de la scola
ancó proprio no se sa
cosa mai che l’abia fato
qua in sti mesi de l’istà!
El dover solo i g’avea,
dirigenti patentati,
ben savendo che tra i “profe”
tanti i è disoccupati,
de studiàr ben el dafàr,
organizàr tuto par tempo,
far in modo che le scole
le partisse a cor contento...
Ma sol dèsso che i ha fato
sensa ’l buso la ciambèla,
e pa’ i studenti e le fameje
za è sonà la campanèla,
i s’ha incòrto finalmente
– pensa ti con che attension –
che un sfrasèl sarà i assenti
sensa giustificassion!:
manca prèsidi e bidèi,
e strumenti coi so addetti,
manca aule e professori,
carta igienica e gessetti!...
E quei stessi gnanca boni
de impegnarse con valor
dèsso in aule meze vùde,
sensa banchi e professor,
pretendarà po’ dai studenti
e da quei che l’ha cunà
el rispetto de le regole
e de la puntualità!
... confermando quel proverbio
che la storia ne disegna:
“Quei che sa, i è quei che fa!
chi no sa... dopo, l’insegna!”