I è za rivadi qua

Proprio de sti giorni i barbari,
come un’orda descaenà,
i ha attentàdo n’antra volta
a la nostra civiltà!
Devastàr i vol del tuto
quel che resta de cultura!,
e tornàdi i è a l’attacco
con l’insulsa copertura!
e i brandisce con orgoglio,
e sicumèra che fa pena,
el progetto ahimé insensato
qua de cuèrzare l’Arena!
E i se inventa che ’l sarìa
solo un soffice velario
che za ne l’antica Roma
el faseva da sudario...
L’era tuta n’antra roba!
L’è na bala!... ma ’sa importa?
Za obedienti ed ossequienti
i giornài ne le riporta!
E i ne conta che ’l dovrìa
salvàr ogni vecia piera...
però intanto i vol sbusàrla
come rati nel gruviera!
E no ghe importa se quel telo,
bombardà da un temporàl,
podarìa insordàr l’orchestra
e la musica che val...
D’altra parte proprio lori
“Arena Extra” avea inventà,
par copàr pian pian la lirica
e far solo varietà
con veline, saltimbanchi,
balerine, altoparlanti,
con strumenti amplificàdi
e microfoni insordanti!...
E i è po’ quei stessi barbari
che vorìa portàr su in sìma
un gigantesco statuon
ben piantà su la collina!...
che progetta par Via Nova
un gran tetto accessoriato,
par far credarghe a la gente
d’essar, lì, al supermercato!...
che coi albari ha distrutto
quel boschetto a l’Arsenàl,
e vol mettarghe al so posto
gran vetrate de cristàl!...
che vorìa ai pori turisti
fàrghe n’antro “marameo”
inventando n’antro falso
con la Casa de Romeo!...
El giornàl, servile, invesse
de fermarli e dar l’alarme,
ghe dà corda ai novi barbari
e ghe lustra ’nca le arme
preparando le rovine,
i disastri e le macerie
discutendo ste sempiàde
come fusse robe serie!
E la gente la se abitua...
e sconfusa, indotrinà,
no la s’ha gnanca inacorto
che za i barbari è rivà!