Ucciso il teatro all’Arsenale

Come sempre da trent’ani,
come vien Pasqua o Nadàl,
riva sempre anca ’l momento
de un progetto de Arsenàl!
E sopraluoghi e paginoni,
foto e schissi in quantità
’ncor ne conta con gran pompa
cosa mai ’l deventarà...
I ghe mettarà reperti,
spassi “open”, piani bar,
biblioteche, ristoranti,
parchi gioco par zugàr!
Tanto i lassa ’ncor che ’l mora:
casca i copi ognor par tera...
da le case sbudelàde
par che sia passà la guera...
Eppur l’è stàdo proprio lì
che in sti ani, con passion,
dei artisti ha regalàdo
un prodigio de emossion:
in un spassio belo grando,
casa un dì de sentinèle,
i s’avea inventà... un teatro
sotto i albari e le stele!
E, a migliaia, i veronesi
ogni istà corea a gustàr,
con el fresco e con la chiete,
tante storie da sognàr...
Dèsso i geni del Comune,
cissà mai par che o par su,
i ha deciso che ’l teatro
lì no se pol farlo più!
Ma par cossa? No se sa!
“Gh’è da vedar, da netàr...”
Ma l’è questa un’emergensa!,
un tesoro da salvàr!
E impegnàdi za a esaltar
tante idee che no sta in pié,
’ntanto tase la notissia
i serventi e i leccapié!
E n’antro toco de cultura
i ha rubàdo a la città
i stessi che ha copà la lirica
come barbari scaenà!
Devastà l’Assessorato,
i l’ha cavàdo via de paca!
così adesso l’è vacante...
e par quel va tuto in vaca.
In malora la cultura!,
e la lirica, e so mare!
I ha copàdo a tradimento
’nca ’l teatro popolare!
Dèsso l’unico teatro
che a l’Arsenale l’è restà
l’è sol farsa, sol tragedia,
o un insulso varietà.