El Pronto (?) Socorso

Gh’è cì va ’l ProntoSocorso
par na bota sul deolìn,
par un brufoleto al naso,
par na macia sul copìn...
Ma è rivà una nova legge
che sto andasso l’ha cambìa!:
d’ora in poi sarà un computer
a dirte se te sì malà!
Ma la gente la protesta:
gh’è stà poca informassion!,
e de ciàro sol gh’è adesso
na gran bela confusion...
con dottori che baruffa,
con passienti che se incassa
quando ’l monitor, sto mona,
in t’un balen el te declassa!
ché dei codici i colori
sèita lì a cambiàr de boto!,
com’ un semaforo che ’l sia
o balengo o mezo roto...
e, cambiando ogni momento,
i fa sempre più pastroci
(anca sensa lavavetri)
dei semafori ai ’ncroci!
Se ’l to mal l’è misterioso
e ’sa ’l sìa l’è quasi un giallo,
no gh’è dubbi sul to caso:
ti te sì... codice giallo!
Ma cì è rivà codìce verde
e po ’l ghe deventa bianco,
po’ ghe toca tornàr casa
coi dolori e sensa un franco!
ché se, dèsso te sì bianco
ma rivà t’eri da verde,
bisòn dèsso che te paghi...
e così te resti al verde!
Pensa invesse che belessa
se te sì codice rosso!
te poarè alor con chiaressa
lì cainàr a più no posso...
e spetàr par ore e ore,
ban dovendo tegner conto
che par sèrto quel Socorso
tuto l’è... manco che Pronto!