L'invasione

Quan’ na volta i ne diseva:
“Sta rivando la cinese”,
se zontava l’aspirina
ne l’elenco de le spese:
de termometro e supposte
no podeimo mìa star sensa,
parché “riva la cinese”
volea dir: gh’è l’influensa!
Se i scriveva sul giornàl
“Ahi! C’è un giallo qua a Verona”
volea dir che gh’era stàdo
un mistero!, ne la zona...
Dèsso, invesse, de sti giorni,
basta te te vardi intorno,
e te capissi che, de giàli,
ghe ne vien dosento al giorno!
E te i cati dapartuto:
oci a mandorla, ridenti,
tuti stessi, picenini,
i è gentili e ’nca ossequienti,
drìo el bancon de novi bar,
de ostarìe, sempre de più...
I è gentili e sorridenti,
ma mi no me cato più...
E succede da ogni parte!
a Montorio, a Tarmassia,
a San Michel, a Vangadissa,
da la vaca de to sìa...
Se catàvimo ogni giorno
coi vecioti del quartier...
quatro ciàcole a la bona
co la festa nel bicier!
Gh’era in banco i ovi duri,
’l caperìn co le aciughete,
gh’era cicioli e seolòti
e le olive e le polpete...
Te podei farte un paneto
con sopressa, i ovi duri...
gh’era foto del Verona
ben schierà su tutti i muri.
Dèsso indove i fasea i ovi
o ’l cafè col masenin,
pitturà i ha tuti i muri
e i g’ha messo “slot mascìn”!
E noantri, proprio in quela
ch’era stà la nostra casa,
se vardemo intorno persi
... e bisogna “nca che tasa...
Sta sparendo el nostro mondo,
indove andàvimo a sognàr...
Con tristessa penso a quelo
che me toccarà magnàr...
Magnaremo i ovi duli,
la pealà col scopeton,
con le tlippe semple plonte
e i fasioi nel minestlon!