... “se parla de gnente!”...

El s’ha rabiàdo, el Sindaco
co la gente sconcertàda
che ha pensà: l’idea del cuèrto
l’è solo na sempiàda.
E, par manifestàrghe
el so dispresso e la so pena,
l’ha comandà che i ghe dasesse
un paginone de “L’Arena”!
“Così almanco – el g’avrà dìto
a quei de la Cultura –
ve risparmìo na fadìga:
scrivar soto dettatura!”
Ubidienti, imantinente,
co na gran genuflession,
a l’ossequio sempre pronti,
i g’ha dato el paginon!
E lì el Sindaco ha deriso
cì ghe vol ruinàr la festa,
cì g’ha la pretesa incauta
de ragionàr co la so testa...
L’ha zontà, con l’elegansa
za ben nota a le so bande,
che cì ha criticàdo el sponsor
g’ha problemi de mudande.
E a la fine, dispressando
l’opinione de la gente,
l’ha sentensìa nel titolo:
“Qua si parla sol di niente!”
“Si parla sol di niente!”...
e qua effettivamente,
se l’è lu quel che le dise,
la pol credarghe, la gente...
parché nei so discorsi,
nei so annunci e i so proclami,
el ghe n’ha dìte tante!,
ma tante!, de sti ani...
L’ha parlàdo del traforo,
el Stadio novo, l’Arsenale,
i musei, la sicuressa,
el cimitero verticale,
la salvessa de la lirica,
el bus de l’anti-sballo,
le centraline de l’alarme,
el filobùs ancora in ballo...
De tute ste promesse
l’ha parlà par anni e giorni,
... ma no è restàdo gnente
ai cittadini ancora storni!...
... e alor bisogna, adesso,
ricognossare par sèrto
che... de parlàr de gnente
nessuno l’è più esperto!