Sempre de corsa

I Re Magi ch’è rivàdi
el sié genàr in Piassa Bra
i s’ha domandàdo tosto:
“Ma... in do’ semo capità?”
Par rivàr za è stà un calvario
par el traffico e la piova...
fermi in coa par du tri ore
là sul Corso Porta Nova...
A ricevarli po’ in Piassa
no butìni imboressàdi,
ma barriere, e militari
con i mitra ben spianàdi!
E su la stella no la scritta
“Alleluja, è qui, fratelli!”
ma “Lonardi Acciaierie”
e po’ “Effe punto telli”!
E po’, al posto dei fedeli
o dei pastori co la secia,
i ha catà che, sora un rogo,
a brustolàr gh’era na vecia!
E su la via de la Capanna,
che i sercàva da Nadàl,
i s’ha cattàdo mescolàdi
in coa con quei del Carneval,
che vegneva ’vanti a onda
impenendose de urtoni,
parché za i se sgombionava
sol par vìnsar le elessioni,
che con quele se confonde
dei politici impegnàdi
za in promesse e gran discorsi
nei comissi pareciàdi
(e no gh’è gran diffarensa
de campagne elettorali...
cambia un poco sol le foto
sempre istesse, tali e quali,
in do’ i politici i appare
sorridenti come d’uso,
i aspiranti a far le mascare
tutti quanti con el muso...)
E gh’è “Saldi” za in vetrina!,
ché... se bate ancor brocheta,
ma a colori i te propone
za el bikini e la bragheta!...
Za che ’l tempo, come un lampo,
scapa in pressia fin lassù...
ma qua femo ormai de tutto
parché  ’l cora sempre più!
Festeggemo primavera
prima ancora del Nadàl,
la Quaresima la ariva
quando è ancora Carneval!
E se confonde le emossioni,
i lutti e le festività...
e tutti ancor sempre de corsa
pa’ andar dove? No se sa.