Meriti e colpe

Co un motivo in sottofondo:
“Meti, cava, cava e meti…”,
è andà in scena, de sti giorni,
el baleto dei divieti!
A Nadàl è ricomparsa
l’emergensa inquinamento,
e in Comune i n’ha anunciàdo
de divieti un bastimento!
“Perdonate, cittadini!
No se pol fàrghene sensa!
Sti divieti i è a combàtar
questa tragica emergensa!”
Ma è bastàdo, el giorno dopo,
de tri gosse un tremolìo
parché i se precipitasse
a far tosto marcia indrìo!
E i divieti rigorosi
con gran pompa za anunciàdi…
n’antra conferensa stampa,
e i è stàdi scancelàdi!
(parché poco ghe interessa
la salute de la gente...
l’è par lori più importante
continuàr a no far gnente)
E se sa che ci aministra
i è, a seconda de la luna,
pronti sempre con gran pompa
a voltàr el bimbo in cuna…
E i sbandiera de sti giorni
el successo eccessionàl
del pienon che ha registràdo
i mercatini de Nadàl!...
(stando atenti a tegner sconto
che in realtà po’ tanta gente
s’ha schissà ’ntorno ai bancheti
ma no l’ha compràdo gnente)
Ma lori dise con orgoglio:
“Se vien gente sempre più,
tutto el merito l’è nostro,
no mìa del Bambin Gesù!”
E i ha intanto trovà ’l modo,
profitando del momento,
de a cì darghe infin la colpa
del viliàco inquinamento:
i è i falò che dapartuto
i se impissa in ogni via
là do’ in tanti se ritrova
a celebrar l’Epifanìa!
Insoma, se tanti festeggia
el Nadàl in confusion,
tutto el merito l’è suo!,
e no de le tradission…
E se l’aria invelenàda
ne tormenta con presagi,
i ne conta che l’è, el smog,
tutta colpa dei Re Magi!