La vergogna del Camploy

Fin da quando i l’ha promesso,
sirca sinquant’anni fa,
el Camploy l’è stàdo sempre
un Teatro disgrassià!
Sensa ancor saver ’sa farne,
fra discorsi e gran proclami,
come un alibi potente
i l’ha promesso par vint’ani...
Po’ i l’ha inaugurà de corsa
quando gh’era le elessioni...
ma in realtà era pronti solo
i tajer de la Sironi!
E i s’ha incorto sol quel giorno,
dopo gran ciàcole e beghe,
che ’l Teatro inauguràdo
l’era ancor sensa careghe!
E quando, dopo, sto Teatro
i s’ha catàdo in dotassion,
pa’ ignoransa i l’ha lassàdo
sensa un strasso de gestion!
El Camploy el ghe serviva
pa’, ogni tanto, contàr bale,
preoccupà sol de cavàrghe
un consenso elettorale...
Finché un giorno i s’ha inventàdo
de affidarlo finalmente,
tra i Uffici comunali,
proprio a quel più incompetente!
che ha tacàdo a regalarlo
a questa e quela Associassion,
no vardando i requisìti,
ma le raccomandassion,
a cambiàr pressi d’affitto
sensa vardàr le qualità,
a invitàr, fra tanti gruppi,
anca quei più scalcagnà!
Finché, sconfuso e lassà sensa
una so precisa identità,
el Camploy – che gran vergogna –
i l’ha infine sassinà!
Eppur adesso sta Stagion
i l’avea za programmà,
pur co i so soliti critèri,
che un criterio no i ghe l’ha!
Ma gh’è rivàda po’ in sti giorni
na proposta un fià indecente:
na Tivù la s’ha proposto
con na somma sconvolgente!
Allor, fedeli e rispettosi
del princìpio un fià slandron
che qua conta solo i schèi,
... i ha accetàdo de scondon!
E quei pori saltimbanchi
che avea za fissà le date
i l’ha lassà in braghe de tela
sensa gnanca le savàte!
Così che ’l Camploy adesso
l’ha ritrovàdo, nel mortuorio,
la so funsione originaria,
ch’era un dì... de dormitorio!
E finc’al Comune più no importa
gnan’ de far brutta figura,
l’è tornà a essar ’l dormitorio
in do’ roncheza... la cultura!