La vergogna de la Cultura

Le continua là in Comune
– e l’è da un toco che le dura –
le squallide baruffe
de quei de la Cultura!
Da na parte un’Assessora
evidentemente nominà
sol par dar con el passato
un segno de continuità:
con Tosi, a la Cultura,
nessun gh’era!, de sti ani!
... par seitàr su quela strada,
i g’ha messo la Briani!...
che no se occupa de gnente!
La so sola competensa
l’è de sfoderar sorrisi
par ogni conferensa!
Da quel’altra, de Cultura
ghe sarìa pur na Commission,
che da mesi la se impegna
par far sol più confusion!
A sta accolita de saggi
i ghe ciama “competente”...
e i discute, e po’ i baruffa,
par po’ no decidar gnente!
Le dovrìa, ste contendenti,
andar d’acordo sempre più,
visto che po’, in sostansa,
no le fa gnente tutte du!
Invesse no!, che ogni momento,
pur quando manco te lo speti,
su ogni problema de cultura
le se fa solo i dispeti!
“I nostr’indirizzi sono
sul suo tavolo da mesi!”
“Decido io! E i provvedimenti
al momento son sospesi!”
“Noi quel bando sì indecente
L’avevamo contestato!”
“È un’accusa strumentale!
Io quel bando l’ho copiato!”
E la Presidente e l’Assessora
le se sèita a sbecolàr
proprio come se le fusse
du galìne in tel puinàr!
E tontona in mezo ai bàgoli
la vosse de l’opposission,
che, invesse de combàttar
la vergognosa situassion,
la se sveja d’improvviso,
e la se indigna solamente
parché un nostalgico pajasso
i l’ha fato vice-presidente!
e sol contro sta nomina
i protesta sensa posa!...
sensa pensàr: vice-presidente...
sì,va ben... ma di che cosa?!
E gh’è cì anca se dimette,
protestando fieramente!...
sensa incorzarse ch’è come
lì dimettarse... dal gnente!
Resta solo la vergogna
– l’è da tanto che la dura –
de vardar come sti pajassi
n’ha ridotto la cultura!