Gh’è mati e mati...

“Veronesi tutti mati”
pol dir za in tute le lingue
quel gran detto popolare
che fra tutti ne distingue.
L’è un bel estro maturlàn,
n’energìa sol positiva,
che sa reinventàr la vita
con la fantasìa creativa...
L’è un’immagine che ostenta
anca i grandi de la storia,
da quel bel San Zen che ride
al Cangrande sensa boria.
No par gnente anca ’l bon Sespir
rappresenta i avi istessi
mossi dà un magico “vento
che volar fa da se stessi”!
L’è sol vento letterario,
ma, sia fredo o fassa caldo,
imparentà l’è co “l’arieta
che vien zo dal Monte Baldo”
Ma n’antro genere de matti
dèsso infesta la città!
I se veste da assessori,
i va in giro mascherà!
E, ogni giorno che Dio manda,
ghe sìa el sol o quando piove,
i se intòrcola el servèl
e i ne inventa una de nove!
E i gh’à amissi giornalisti,
col servèl sempre più in ferie,
che ghe illustra le sempiàde
come fusse robe serie!
De sti ani i s’ha inventàdo
el cimitero verticale,
e po’ el cuèrto de l’Arena,
la distrussion de l’Arsenale,
na tettoia par Via Nova
come fùssimo al marcà,
una statua gigantesca
in collina ben piantà,
e la casa de Romeo
falsa ancor più de Giulieta,
i quartieri stofegàdi
del cemento ne la streta...
Dèsso l’ultima trovata
i s’ha inventàdo a ropeton:
una rùda gigantesca
ben piantàda in Via Balon!,
che la intàsa ben el traffico,
e distoglie l’attension
dai capolavori veri
che g’avemo sul Liston...
ma permettarìa da l’alto
– non vi pare gnanca vero? –
lo spettacolo gioioso
de le tombe in cimitero!
Se volemo che Verona
cressa ancora chieta e sana,
dai, fermèmoli sti mati!,
riportemoli a Marsana!
E, quando i inventa ste sempiàde,
più no stèmoli a scoltàr!
De sicuro i è par sèrto
solo matti da ligàr!