El pilotìn “a scomparsa”

Dopo mesi de proclami,
de progetti, anunci e bale,
presentà i avea in gran pompa
“il nuovo centro pedonale”!
“Sarà via Sant’Anastasia
– prometteva i sapientoni –
sensa più n’auto che passa
il paradiso dei pedoni!”
Senonché dopo i scominsia
a pensàr mile eccessioni
par no scontentàr nissun,
ch’è vissine le elessioni...
Fatto sta che, come spesso,
po’ un pastrocio i ne combina,
e le macchine le gira
tanto istesso come prima!
De controlli, gnanca uno!,
ché, par ben che la te vada,
du tri vigili te i vedi
sconti solo a metà strada.
Passa machine, furgoni,
bici, bus e motorini
coi motori rimbombanti
che infumenta ’nca i butini.
Ghe sarìa du cavaleti
par proibìr accesso e sosta,
ma chi vol passàr in auto...
basta solo che ’l le sposta!
E i n’aveva presentàdo
il pilottino ch’è “a scomparsa”,
esaltàdo con orgoglio!...
l’era solo n’antra farsa!
E n’antra volta i cittadini
i se sente imbidonàdi
da progetti strabilianti
con solenità ’nucianciàdi...
come i bus de l’antisballo,
come el cuerto de l’Arena,
come filobus, traforo,
l’Arsenale che fa pena,
e la lotta contro ’l smog,
e Museo, funicolare,
de la lirica el rilancio,
l’amministrassion del fare...
E de quel che, struca-struca,
n’è restàdo qua in realtà,
na robeta solamente
se avvisìna a verità:
che quel pilotin famoso,
“star” de sto progeto smarso,
più nessuno mai l’ha visto,
e in effetti... l’è scomparso.