El conlitto de competense

È vignù fora de sti giorni,
in attesa de sentense,
che ghe sarìa stà un conflitto,
un scontro fra du competense,
fra ’l capeggiàr Arena Extra
e comandàr la Fondassion...
(un po’ come metar ’nsieme
du galeti co un capon).
Ma ha risposto Girondini:
“No è mìa vèra! Solo beghe!
Col sedere accessoriato
posso star su du careghe!”
In realtà, in sti quatro ani,
par far posto ai concertoni,
l’ha mandàdo i musicisti,
a provàr nei capannoni!,
dove domina el rimbombo,
in do’ no se capisse gnente,
se mortifica la musica,
che più ciàra no se sente!
Par far posto a trasmissioni
co le star de la tivù,
a piste, giàsso, indossatrici,
pattinaggi col tutù.
L’ha costretto cori e orchestra
a provàr de fugaton,
strafregandose se intanto
va la qualità in balon!...
Par poderghe far de tuto,
far più ciasso de na olta,
l’ha lassàdo de l’Arena
un’immagine stravolta:
l’ha somenàdo l’ignoransa
de la musica più grande...
no ’l se intende mìa de acuti,
coi ottusi el va a la grande:
“L’è un baritono che serve?
Mi lo cato sensa inghippi!
Qua nel tempio de la lirica
ho portà... la De Filippi!”.
Po’, disendo che la lirica
ormai piàse sempre manco,
l’ha pensà soltanto a quelo
in do’ se pol ciuciàr un franco.
Ma a cì adesso ghe contesta,
proprio in punta de diritto,
che fra le du competense
ghe sarìa in realtà un conflitto,
“Non è vero!” el sèita a dir,
e serafico l’insiste:
“Il conflitto competenze
nel mio caso non esiste!”
... e nol g’ha mìga tuti i torti:
za se pol dir, sensa sentense,
che ’l conflitto sèrto el gh’era,
no gh’è mai stà... le competense!