El progetto... infinito

I l’ha dìto tuti quanti:
l’è un progetto demensiale!,
un’idea proprio balenga
’l cimitero verticale!
I l’ha dìto e ripetùdo
tutti quanti i cittadini:
veci, adulti e giovinoti,
noni e mame coi butìni.
I l’ha dìto in tuti i posti,
Marangona o San Michel:
chi ha pensà de far st’obrobio
s’ha magnàdo ’nca ’l servèl!
Ma, come tutte ste proteste
no valesse proprio gnente,
’ncora i geni del Comune
se ne impìpa de la gente
e imperterriti i riprova:
dèsso i dise: “Val la spesa,
el cimitero, farlo nàssar
dove gh’è la Genovesa!”
E no i mola el so progeto!
No ghe importa se anca là
dopo insorge i cittadini
stupefatti e po’ indignà:
na motivassion le move!,
questa sola, fra le tante:
“Quel che – i dise – i n’ha promesso
l’è una cifra interessante!”
...come a dir: “Basta che i paga,
e podemo far de tuto!
El decoro e la cultura
tut’alpiù metarà ’l luto!
La pol essar na sempiàda,
ma, se i paga, val la pena!
Se pol far più sagre in Bra,
o un puinàro ne l’Arena!”
I è quei stessi che in sti giorni,
in campagna elettorale,
i ne conta: “I cittadini!,
par noantri è quel che vale!
e la crescita, el progresso,
el benessere sociale,
l’opinione de la gente,
e la vita culturale!...”
Intanto i serca de ciuciàr
quel che dà “Cielo Infinito”...
e un sospetto qua ne nasse:
sol l’imbròjo... l’è infinito.