El brindisi

Contestando i contenuti
del Convegno veronese,
fra i tanti anca Di Maio
el l’ha tirà zo da le spese,
e l’ha dito che a Verona
gh’è na manega de ottusi,
de balenghi medioevali,
de fanatici confusi!...
Ma no ’l ghe l’avea par sèrto
con tuti, tuti i cittadini:
sol con quei che predicava
proponendose altri fini...
Ma l’ha ciapà la bala al balso
el Sindaco, insustà,
ben felice de mostrarse
el paladin de la città!
E ’l ghe n’ha dìto un progno:
“Sta ’tento ti, Di Maio!
Adesso, con mi Sindaco,
t’he catà quel del formàjo!
S’ha in sti giorni dimostràdo
che qua non ci son barriere!
Ognun può liberamente
qua esternare il suo parere.
L’ha fatto pure quel tal Circolo
dal nome – Pink – bestiale,
e l’han fatto i Partigiani
da una sede comunale!”
(el g’ha tasùdo in verità
che questi el le volea sfrattati,
e a quei altri la Gran Guardia
el ghe l’ha data a grati!)
“Ma no pensàr dèsso al Vinitaly
vegner bear a garganella!
Ghe semo za noantri
qua a far la passerella!
E se proprio te vol vègnar,
ricorda ben come se usa:
prima de far un bel brindisi,
bisòn qua domandàr scusa!”
Così, partìda la commedia
da un copion tanto banale,
l’è rivàda infin la farsa
al prevedibile finale:
i s’ha visto, i s’ha incontràdo,
no ’l s’ha mia sèrto scusàdo...
ma del potere i ha parlàdo!
E a la fine... i ha brindàdo!
... come da antica tradission,
la più vecia che ghe sia:
le barufete fra potenti
i le risolve a l’osteria!
E tutti quei che avea credùdo
a cissà qual giusta bega
i l’ha rivisti sorridenti
sentà su la carega...
fin che ’l Sindaco ghe spiega
ogni so benemerensa,
illustrando la so nova
grand’onorificensa...
e l’eccellensa che se cata
qua del bear, del magnàr!
... no par gnente ancò i l’ha fato
“Cavalier del Bon Cuciàr”!